Նախագահ Սարգսեան Գնաց Մոսկուա` Մասնակցելու Առաջնորդանիստ Մայր Եկեղեցւոյ Բացման Արարողութեան:

Հայաստանի նախագահ Սերժ Սարգսեան երկուշաբթի 16 սեպտեմբերին մեկնեցաւ Մոսկուա` մասնակցելու Մոսկուայի Հայոց առաջնորդանիստ եկեղեցւոյ օծման եւ եկեղեցական համալիրի բացման արարողութեան:
Ամենայն Հայոց Գարեգին Բ. կաթողիկոսը պիտի կատարէ Մայր եկեղեցւոյ օծման արարողութիւնը: Արարողութեան պիտի մասնակցին Հայաստանի եւ Լեռնային Ղարաբաղի նախագահները, ինչպէս նաեւ Մոսկուայի եւ Համայն Ռուսիոյ Քիրիլ պատրիարքը:
Որոշ աղբիւրներ տարածած էին այն տեղեկութիւնը, որ Ռուսիոյ նախագահը նաեւ պիտի մասնակցի հայկական եկեղեցւոյ բացման, սակայն «Ազատութիւն» ձայնասփիւռի կայանին տուեալներով Փութին պիտի չմասնակցի բացման եւ որեւէ հանդիպում չէ նախատեսուած Ռուսիոյ եւ Հայաստանի նախագահներուն միջեւ:
Հայ առաքելական եկեղեցւոյ Ռուսիոյ եւ Նոր Նախիջեւանի թեմի վանական համալիրը կառուցուած է ռուսաբնակ հայ մեծահարուստներու միջոցներով: Համալիրը կը գտնուի Մոսկուայի կեդրոնը, Տրիֆոնովսքայա փողոցին մէջ` կազմելով 25 հազար քառակուսի մեթր տարածք: Այստեղ, Մայր եկեղեցիէն բացի պիտի գործեն մատուռը, թեմի առաջնորդի նստավայրը, ուսումնական համալիրը, ինչպէս նաեւ հայկական շարք մը կազմակերպութիւններու գրասենեակները:
Մայր եկեղեցին կրնայ ընդունիլ աւելի քան հազար անձեր: Ասիկա Հայաստանէն դուրս գտնուող մեծագոյն հայկական կրօնական համալիրն է:
Եկեղեցւոյ հիմնաքարի օծման արարողութիւնը տեղի ունեցած էր 2004-ին: Շինարարական աշխատանքները սկսած էին 2006-ին:
Նշենք, որ 18 սեպտեմբերին Մոսկուայի մէջ տեղի պիտի ունենայ «Հայաստան» հիմնադրամի աւանդական դրամահաւաքը, որուն պիտի մասնակցին Հայաստանի եւ Լեռնային Ղարաբաղի նախագահները, ինչպէս նաեւ ռուսահայ գործարարներ: